Mae Marchnad Abertawe wedi sicrhau cyllid i gyflwyno pecyn gwelliannau gwerth £439,000.
Bydd y gwaith yn cynnwys ychwanegu toiledau cyhoeddus, yn ogystal ag ardal gymunedol aml-ddefnydd, Wi-Fi cyhoeddus am ddim, arwyddion LED rhyngweithiol newydd a mynedfeydd gwell.
Disgwylir i’r gwaith ddechrau’r haf hwn a chaiff ei gwblhau gyda ffocws agos ar ganllawiau cadw pellter cymdeithasol y llywodraeth.
Meddai Robert Francis-Davies, Aelod Cabinet y Cyngor dros Fuddsoddi, Adfywio a Thwristiaeth, “Rwy’n falch ein bod yn gallu cyhoeddi’r gwaith pwysig hwn.
“Rydym wedi bod yn gweithio’n agos iawn gyda masnachwyr y farchnad ac wedi gwrando ar gwsmeriaid i nodi a blaenoriaethu gwelliannau sylweddol a fydd yn sicrhau bod Marchnad Abertawe’n cadw ac yn datblygu ei henw fel calon ganol y ddinas.
“Mae’r gwelliannau’n canolbwyntio ar gryfhau yr hyn y mae’r farchnad yn ei gynnig i’r cyhoedd a masnachwyr yn gyffredinol. Bydd ein cynllun yn gwella atyniad y farchnad fel cyrchfan ac yn cynyddu ei phroffil fel atyniad siopa allweddol a thirnod yng nghanol y ddinas.
““Er y cydnabyddir y bydd effeithiau’r pandemig yn para am gryn amser, mae’r cyngor yn parhau i fod yn gadarn yn ei gefnogaeth ar gyfer busnesau lleol a datblygiad parhaus Abertawe fel cyrchfan o’r radd flaenaf.”
Ariennir y prosiect gwella gwerth £439,000 ar y cyd gan raglen Trawsnewid Trefi Llywodraeth Cymru a’r cyngor.
Mae’r gwelliannau’n cynnwys y canlynol:
- Toiledau i gwsmeriaid. Bydd hyn yn cynnwys toiledau neillryw, gan gynnwys uned gwbl hygyrch a chyfleuster ‘Changing Places’ ar gyfer y rheini ag anghenion gofal difrifol.Bydd y contractwr a fydd yn gwneud yr holl waith hyn yn cael ei benodi’n fuan a bydd y gwaith yn dechrau maes o law yn unol â’r canllawiau diogelwch.
- Bydd ardal gymunedol ar gyfer eistedd, bwyta, cwrdd a chyfarch. Bydd hwn yn lle aml-ddefnydd croesawgar a hygyrch yng nghanol y farchnad. Bydd yn ardal amlwg wedi’i diffinio gan ddyluniad creadigol, pwrpasol i greu nodwedd weledol amlwg a fydd yn helpu i droi’r farchnad yn atyniad i ymwelwyr. Caiff ei steilio fel gardd dan do, er mwyn dod â’r awyr agored y tu mewn ac adlewyrchu dyheadau’r cyngor i greu amgylchedd gwyrddach yng nghanol y ddinas. Bydd yr ardal newydd, sydd ar hyn o bryd yn gartref i fasnachwyr achlysurol, yn parhau i gynnal digwyddiadau megis y Farchnad Fach Feganaidd hynod boblogaidd. Bydd lle i fasnachwyr achlysurol yn y farchnad o hyd.
- Cysylltedd. Er mwyn cefnogi busnesau’r farchnad, ac i roi’r profiad gorau posib i ymwelwyr, gosodir Wi-Fi drwy’r adeilad.
- Gwybodaeth i Gwsmeriaid. Er mwyn helpu cwsmeriaid i ddod o hyd i’r hyn y mae ei angen arnynt yn y farchnad yn hawdd ac yn gyflym, gosodir sgrîn LED ddigidol ryngweithiol ym mhob un o’r pedwar cyntedd mynediad. Bydd y sgriniau hyn yn dangos lleoliadau’r stondinau ac yn rhoi’r wybodaeth ddiweddaraf am ddigwyddiadau, gweithgareddau a chynigion arbennig y farchnad ac ar draws canol y ddinas.
- Gwelliannau i fynedfeydd. Bydd pedair mynedfa gyhoeddus y farchnad yn cael eu hailddylunio fel eu bod yn hygyrch ac i godi proffil y farchnad drwy wella hygyrchedd ac apêl.
Er ein bod ar gau i’r cyhoedd ar hyn o bryd, mae nifer o fasnachwyr yn cynnig gwasanaethau dosbarthu i helpu’r gymuned leol yn ystod pandemig Coronafeirws – rhagor o wybodaeth yma: www.swanseaindoormarket.co.uk/y-diweddaraf-am-coronafeirws-covid-19/?lang=cy